Republic Day પરેડની ટિકિટ ઓનલાઈન આ રીતે કરો બૂક, જાણો પ્રાઈસ

આગામી સપ્તાહે ગણતંત્ર દિવસની દેશભરમાં ઉજવણી થશે. ગણતંત્ર દિવસે દિલ્હીમાં રાજપથ પર ભવ્ય પરેડનું આયોજન થાય છે. આ પરેડ જોવાની ઈચ્છા દરેક ભારતીયની હોય છે. આ પરેડ દરમિયાન તમને ભારતીય સૈન્યના હથિયારો અને દરેક રાજ્યના સાંસ્કૃતિક ટેબ્લો એકદમ નજીકથી જોવા મળે છે. પરંતુ આ પરેડ જો તમારે રાજપથ પર હાજર રહીને જોવી હોય, તો તેના માટે ખાસ ટિકિટ લેવી પડે છે. ભારત સરકાર આ પરેડની ટિકિટ ખૂબ જ લિમિટેડ સંખ્યામાં આપે છે. જો આ વર્ષે તમે પણ પરેડ જોવા ઈચ્છો છો, તો તમારે ઓનલાઈન ટિકિટ લેવી પડશે. જેની આખી પ્રક્રિયા અમે તમને આ આર્ટિકલમાં જણાવીશું. અહીં પરેડની સાથે સાથે બીટિંગ ધ રિટ્રીટની ટિકિટ લેવાનો પણ ઓપ્શન છે.

કેટલા વાગે શરૂ થાય પરેડ?

26 જાન્યુઆરી એટલે કે ગણતંત્ર દિવસની પરેડ વિજય ચોકથી સવારે 10 વાગે શરૂ થાય છે. આ પરેડ જોવા માટે તમારે તમારી સીટ પર 9.30 વાગ્યે બેસી જવું જરૂરી છે. પરેડ દિલ્હીના નેશનલ સ્ટેડિયમ પાસે પૂરી થાય છે. જે મુખ્ય જગ્યાથી લગભગ 5 કિલોમીટર દૂર છે. એટલે આ પટ્ટામાં બેસીને તમે ગણતંત્ર દિવસની પરેડ જોઈ શકો છો.

કેટલી હોય છે પરેડની ટિકિટ?

ગણતંત્ર દિવસની પરેડ જોવાની ટિકિટ 20 રૂપિયાથી લઈને 500 રૂપિયા સુધીની હોય છે. આ ટિકિટ બુકિંગ 10 જાન્યુઆરીથી શરૂ થઈ ચૂક્યુ છે. 25 જાન્યુઆરી સુધી દેશના નાગરિકો આ પરેડની ટિકિટ બૂક કરી શકે છે. રોજ એક નિશ્ચિત સંખ્યામાં આ પરેડની ટિકિટ બૂક કરી શકાય છે.

આ રીતે બૂક કરો પરેડની ટિકિટ

રિપબ્લિક ડેની પરેડની ટિકિટ બૂક કરવાની પ્રક્રિયા ખૂબ સરળ છે. આ માટે તમારે બસ નીચે આપેલા સ્ટેપ્સ જ ફોલો કરવાના છે.

સ્ટેપ 1: સૌથી પહેલા તમારે ડિફેન્સ મિનિસ્ટ્રીની વેબસાઈટ www.aamantran.mod.gov.in પર જવાનું છે.

સ્ટેપ 2: હવે અહીં તમારે એક અકાઉન્ટ ક્રિએટ કરવાનું છે.

સ્ટેપ 3: બાદમાં આ અકાઉન્ટમાં પર્સનલ ડિટેઈલ્સ જેમ કે નામ, જન્મ તારીખ, મોબાઈલ નંબર ઈનપુટ કરવાનો છે. છેલ્લે તમારા મોબાઈલ પર એક ઓટીપી આવશે, જે વેરિફિકેશન માટે જરૂરી છે.

સ્ટેપ 4: હવે છેલ્લે તમારે ઈવેન્ટ ઓપ્શન સિલેક્ટ કરવાનો છે. જેમાં રિપબ્લિક ડે પરેડ, બીટિંગ ધ રીટ્રિટ સામેલ છે. તમે જે જોવા ઈચ્છો, તે સિલેક્ટ કરી શકો છો.

સ્ટેપ 5: ઓનલાઈન ટિકિટ લેવા માટે તમારે તમારો ફોટો અપલોડ કરવો જરૂરી છે. સાથે જ ઓરિજિનલ ફોટો આઈડીનો નંબર પણ આપવો પડશે.

સ્ટેપ 6: છેલ્લે તમારે ઓનલાઈન પેમેન્ટ કરવાનું છે. આટલું કરતા જ તમારી ટિકિટ બૂક થઈ જશે.