iPhoneમાં આ વસ્તુ ક્યારેય ટાઈપ ન કરતા, નહીં તો ફોન તાત્કાલિક ક્રેશ થઈ જશે

એપલ આઈફોન યુઝર્સ માટેનું એક ચોંકાવનારું બગ સામે આવ્યું છે, જેને કારણે માત્ર કેટલાક કેરેક્ટર્સ ટાઈપ કરતા જ આઈફોન ક્રેશ થઈ જાય છે. આ બગ આઈફોન યુઝર્સને કોઈ લિંક કે અપડેટ દ્વારા મુશ્કેલીમાં નથી મૂકી રહ્યું, પરંતુ જો યુઝર્સ કેટલાક ખાસ કેરેક્ટર્સ ટાઈપ કરે તો જ આઈફોન આખેઆખો ક્રેશ થઈ જાય છે. આ બગ એવા યુઝર્સને હેરાન કરી રહ્યું છે, જે પોતાના આઈફોન પર iOS 17 યુઝ કરી રહ્યા છે.

આ નવા બગની માહિતી Mastodonમાં સુરક્ષા રિસર્ચરે આપી છે, અને તેમણે આપેલી માહિતી પ્રમાણે એવા ચાર કેરેક્ટર્સ છે, જેને ટાઈપ કરવાની સાથે જ આઈફોન ક્રેશ થઈ રહ્યા છે. જો યુઝર્સ ડબલ કોટેશન માર્ક્સ અને બે કોલન (""::) એકસાથે ટાઈપ કરે છે, તો ડિવાઈસ ક્રેશ થઈ જાય છે. જે બાદ તમારે આખો ફોન રિસ્ટાર્ટ કરવો પડી શકે છે. આઈફોનમાં રહેલી આ ખામી સ્પ્રિંગબોર્ડ તરીકે ઓળખાય છે, જેને કારણે ડિવાઈસ ક્રેશ થઈ જાય છે.

આ વસ્તુ આઈફોનમાં ક્યારેય ટાઈપ ન કરશો

આઈફોન અંગેના સિક્યોરિટી રિસર્ચરના કહેવા પ્રમાણે જો યુઝર્સની ડિવાઈસમાં રહેલી એપ લાઈબ્રેરી કે સેટિંગ્સમાં જઈને ઉપર જણાવ્યા તે પ્રકારના કેરેક્ટર ટાઈપ કરવામાં આવે છે, તો જ તમારું ડિવાઈસ ક્રેશ થઈ શકે છે. અમારી ટીમે જો કે આ વસ્તુ ટેસ્ટ નથી કરી, કે આવું ખરેખર થઈ રહ્યું છે કે નહીં. પરંતુ મોટા ભાગના મીડિયા રિપોર્ટ્સ આ જ વાત જણાવી રહ્યા છે. ક્રેશ અને રિબૂટના આ ઈસ્યુને આગામી કેટલાક અપડેટ્સમાં એપલ દ્વારા ફિક્સ કરવામાં આવી શકે છે.

એપલે કોઈ જાહેરાત નથી કરી

હાલમાં તો એપલે આ બગ અંગે કોઈ જાહેરાત નથી કરી, ન તો કોઈ નિવેદન આપ્યું છે. સાથે જ આ બગ ક્યાં સુધીમાં ફિક્સ થશે તે અંગે પણ કોઈ ખુલાસો નથી કર્યો. શક્ય છે કે આગામી કોઈ અપડેટ્સમાં અલગથી મેન્શન કર્યા વગર આ બગને ફિક્સ કરી દેવામાં આવે. સારી વાત એ છે કે આ કેરેક્ટર્સ ટાઈપ કરીને જો કોઈ તમને મોકલે તો તમારું ડિવાઈસ ક્રેશ નથી થઈ શક્તું. માત્ર તમારા ડિવાઈસના યુઝર જ આ કેરેક્ટર ટાઈપ કરવાથી જ તમારું ડિવાઈસ ક્રેશ થઈ શકે છે.

ઉલ્લેખનીય છે કે આ પહેલા પણ આઈફોનમાં આ પ્રકારની મુશ્કેલીઓ આવી ચૂકી છે, જેમાં સિક્રેટ કોડ્સ દ્વારા ડિવાઈસને ક્રેશ કરી શકાય છે. જો કે, આ પ્રકારના બગથી કોઈ મોટો ખતરો નથી, એટલે ચિંતા કરવાની જરૂર નથી.